प्यूठान। प्रतिनिधिसभा निर्वाचन नजिकिँदै जाँदा प्यूठानको राजनीतिक तापक्रम उकालो लागिरहेको छ। यही बीच नेकपा एमालेका उम्मेदवार सुर्य थापा ले आफू निकट मिडिया प्रयोग गर्दै आफ्ना जनप्रतिनिधिहरूको बचाउ र नेपाली कांग्रेसका युवा नेता तथा लुम्बिनी प्रदेश सरकारका मन्त्री रोज राणा विरुद्ध आचारसंहिता उल्लंघनको ‘काउन्टर अभियान’ सुरु गरेको आरोप लागेको छ।
मन्त्री राणाले केही महिना पछि आफ्नो निर्वाचन क्षेत्रमा निर्माणाधीन सडक आयोजनाको अनुगमन तथा कार्यकर्ता भेटघाटका क्रममा आएको बेला एमालेतर्फबाट योजनाबद्ध रूपमा “मिडिया ट्रायल” सुरु गरिएको दाबी गरेका छन्।
“म आफ्नो क्षेत्रमा आउन, जनतासँग भेटघाट गर्न नपाउने ? विकास आयोजनाको अनुगमन गर्न नपाउने ?” — राणा
उनले प्रतिप्रश्न गरे—
“एमालेबाट गाउँपालिका जितेका सरुमारानी गाउँपालिका अध्यक्ष झग बहादुर बि.क.ले उम्मेदवारलाई विद्यालय महोत्सवमा लिएर चुनावी सभा गर्ने, नौबहिनी गाउँपालिका अध्यक्ष दिलबहादुर थापा आफ्नै पालिकाका वडा–वडामा उम्मेदवारसँग भाषण गर्दै हिँडेको नदेख्ने ? कि आँखा पनि देख्न छोड्नु भयो ?”
कांग्रेस पक्षको आरोप छ— एमालेले आफ्ना जनप्रतिनिधिहरू चुनावी गतिविधिमा सक्रिय हुँदा मौन बस्ने तर विपक्षी नेता क्षेत्रमै पुग्दा आचारसंहिता उल्लंघन भन्दै आफ्ना मिडिया ट्रायल गर्ने रणनीति अपनाएको छ।
एकातिर एमालेले आचारसंहिताको मुद्दा उठाएर कांग्रेसलाई रक्षात्मक बनाउने रणनीति लिएको देखिन्छ, अर्कोतर्फ कांग्रेसले “दोहोरो मापदण्ड” को सवाल उठएको छ ।
निर्वाचन आयोगको आचारसंहिताको व्याख्या कसरी हुन्छ भन्ने प्रश्नसँगै प्यूठानको चुनावी राजनीति अब कानुनी, नैतिक र प्रचारात्मक तीनै मोर्चामा भिडन्ततर्फ उन्मुख देखिएको छ।
