काठमाडौं ।
मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउन महाअभियान नेपाल’का संयोजक दुर्गा प्रसाईं वीरगञ्जबाट पक्राउ परेका छन् ।
प्रहरी स्रोतका अनुसार प्रसाईंलाई वीरगञ्जस्थित दियालो होटलबाट सोमबार साँझ पक्राउ गरिएको हो । पक्राउका क्रममा प्रहरीले “माथिको आदेश” आएको भन्दै नियन्त्रणमा लिएको बताइएको छ ।
यद्यपि, उनीमाथि कुन कसुरमा कारबाही गरिएको हो भन्ने विषयमा प्रहरीले औपचारिक जानकारी दिएको छैन । प्रहरी स्रोतले पक्राउको पुष्टि गरे पनि विस्तृत विवरण सार्वजनिक भइसकेको छैन ।
प्रसाईं सोमबार सिमरा विमानस्थल हुँदै वीरगञ्ज पुगेका थिए । मंगलबार वीरगञ्जमा आयोजना हुने कार्यक्रममा सहभागी हुन पुगेका उनले विमानस्थलमै सञ्चारकर्मीसँग समसामयिक राजनीतिक विषयमा धारणा राखेका थिए ।
उनले वर्तमान सरकार र राष्ट्रिय स्वतन्त्र पार्टी (रास्वपा) का केही सांसदमाथि आलोचनात्मक टिप्पणी गरेका थिए । त्यसलगत्तै उनी पक्राउ परेपछि घटनाले नयाँ राजनीतिक तरंग पैदा गरेको छ ।
