प्यूठान । एक मात्र प्रतिनिधिसभा निर्वाचन क्षेत्र रहेको प्यूठानमा आगामी फागुन २१ गते हुने प्रतिनिधि सभा निर्वाचन–२०८२ का लागि १० दलले आफ्ना उम्मेदवार टुंग्याइसकेका छन्। निर्वाचन आयोगले सार्वजनिक गरेको कार्यतालिका अनुसार भोली (माघ ६, मंगलबार) मनोनयन दर्ता हुने छ।
नेपाली कांग्रेसले यसपटक डा. गोबिन्दराज पोखरेललाई उम्मेदवार बनाउने निर्णय गरेको छ। २०७९ को प्रतिनिधि सभा चुनावमा विजयी भएका नेकपा (एमाले)का सूर्यबहादुर थापालाई दलले पुनः दोहोर्याएको छ। भदौ २३–२४ मा भएको जेन्जी आन्दोलनपछि उत्पन्न राजनीतिक संकटले प्रतिनिधि सभा विघटन भएको पृष्ठभूमिमा दुवै दलबाट पुरानै अनुहार उत्रिएका हुन्। राष्ट्रिय स्वतन्त्र पार्टीले सुसान्त वैदिकलाई उम्मेदवार बनाउने भएको छ।
नेकपा मसाल (राजमो)ले झिमरुक गाउँपालिकाका पूर्व अध्यक्ष तिलक जी.सी.लाई अगाडि सारेको छ।
नेपाली कम्युनिस्ट पार्टीले लुम्बिनी प्रदेशका पूर्व मन्त्री कृष्णध्वज खड्कालाई उम्मेदवार बनाएको छ। श्रम–संस्कृति पार्टीबाट गोबिन्द गिरी, प्रगतिशील लोकतान्त्रिक पार्टीबाट स्याम गहतराज, नेकपा (माओवादी)बाट सीता विक (सम्झना),नेपाली जनता दलबाट बिमल पोखरेल त्यसैगरी राष्ट्रिय प्रजातन्त्र पार्टीबाट धनेश्वर पण्डित मनोनयनमा आउने तयारीमा छन्।
चुनाव नजिकिँदै जाँदा जिल्लामा राजनीतिक सरगर्मी चर्किएको छ। सर्वसाधारणको धारणा अनुसार कांग्रेसका डा. गोबिन्द पोखरेल र एमालेका सूर्यबहादुर थापाबीच नै मुख्य प्रतिस्पर्धा हुने देखिएको छ।
