काठमाडौँ । नेपाली कांग्रेसको केन्द्रीय कार्यसमिति बैठकमा महामन्त्री गगनकुमार थापाले क्रियाशील सदस्यता सम्बन्धी प्रतिवेदन पेश गरेका छन् ।
उक्त प्रतिवेदनमा क्रियाशील सदस्य संख्या ८ लाख ७० हजार ७८० रहेको र तीमध्ये १४ औँ महाधिवेशनमा ४ लाख २३ हजार ४३४ नवीकरण भएको, ४ लाख ४७ हजार ३४६ नयाँ सदस्यता लिएको र नेपाली जनसम्पर्क समितिबाट १९ हजार ५९२ रहेको उल्लेख छ ।
क्रियाशील सदस्यता नवीकरणको फारम २०७९ चैत २२ गतेदेखि नै जिल्लामा पठाउन शुरू गरिएको र अहिलेसम्म ८ लाख ७० हजार ८८४ सदस्यता नवीकरण फारम पठाइसकिएकोसमेत उल्लेख छ ।
प्रतिवेदनमा महामन्त्री थापाले जिल्लाबाट विवरण आउने क्रम जारी रहेको बताएका छन् । असार १२ गतेसम्म प्राप्त जानकारी भन्दै परिपत्र तोकिए बमोजिम नवीकरण विवरण प्रविष्ट गरेका–बुझाएका जिल्ला ५ ओटा रहेका छन् ।
सिष्टममा प्रविष्ट भइरहेका जिल्ला १५ रहेका छन् । त्यस्तै निर्णय प्रक्रियामा रहेका जिल्लाहरु १० रहेका छन् ।
वडाबाट जिल्लामा नवीकरण फारम संकलन भइरहेका जिल्ला ३३ रहेका छन् भने १४ जिल्लामा नवीकरण समस्या रहेको प्रतिवेदन महामन्त्री थापाले बैठकमा पेश गरेका छन् ।
असार मसान्तसम्म प्रविष्ट गर्नका लागि भनिए पनि मोबाइल नम्बर अनिवार्य सहितको फारम बनाएर विवरण बुझाउन भनिएकाले केही समय लागेको जानकारी प्राप्त भएकोसमेत उनले उल्लेख गरेका छन् ।
त्यसैगरी नयाँ क्रियाशील सदस्यता फारम दुई लाख १७ हजार १०१ (नवीकरण भएको सदस्य संख्याको २५ प्रतिशत) पठाइसकिएको उल्लेख छ ।
१७ जिल्लाले वडामा सदस्यता फारम बुझाएको जानकारी गराए पनि दोलखा बाहेक कुनै पनि जिल्लामा नयाँ क्रियाशील सदस्यता विवरण भएको जानकारी प्राप्त हुन नसकेको थापाले उल्लेख गरेका छन् ।
हाल नवीकरणमा ध्यान दिन र हाल नयाँ वितरण नगर्नका लागि सबै जिल्लालाई जानकारी गराइएकोसमेत उल्लेख गरिएको छ ।
नयाँ सदस्यता उपलब्ध गराउँदा जनसंख्या, मतसंख्या, क्लष्टर अनुसारको संख्या र सदस्यताको माग एवं आवश्यकता समेतलाई हेरी उपलब्ध गराउने गरी मापदण्ड बनाइ साउनपछि वितरण अभियान गरिनेसमेत महामन्त्री थापाले प्रतिवेदनमा उल्लेख गरेका छन् ।
जनसम्पर्क समिति सदस्यताको व्यवस्या गरी सदस्यता फारम र वितरण प्रक्रिया अगाडि बढाइएको उनले उल्लेख गरेका छन् ।
